پاکستانی کرنسی کی قدرمیں روزبروزکمی، انٹربینک میں ڈالر پہلی بار230روپے سے متجاوز

پاکستان کی کرنسی کی قدر میں روزبروز کمی کا سلسلہ جاری ہے اور جمعرات کو ڈالر کےانٹربینک ریٹ ملکی تاریخ میں پہلی بار 230 روپے سے تجاوز کر گئے ہیں۔

ملک میں یومیہ بنیادوں پر معاشی چیلنجز میں اضافے، کمرشل بینکوں کی جانب سے آئل امپورٹ لیٹر آف کریڈٹس زرمبادلہ کی مہنگی لاگت پر کھولنے کی خبروں کے باعث ڈالر کی تیز رفتار پرواز جاری ہے۔

انٹربینک مارکیٹ میں سپلائی نہ ہونے کے باوجود بڑھتی ہوئی مانگ کے نتیجے میں ڈالر کے انٹربینک ریٹ 5.10 روپے کے اضافے سے 230.01 روپے کی نئی بلند ترین سطح پر پہنچ گئے۔

ذرائع کا کہنا ہے کہ سٹے باز منفی افواہیں پھیلاکر ڈالر میں سٹے بازی کر رہے ہیں جبکہ بینک دولت پاکستان نے روپے کی قدر میں نمایاں کمی کے عوامل کی وضاحت کرتے ہوئے کہا ہے کہ متحرک مارکیٹ پر مبنی شرح مبادلہ کے نظام کے تحت جاری کھاتے کی صورتحال، متعلقہ خبروں اور اندرونی بے یقینی مل کر یومیہ بنیادوں پر روپے کی قدر میں تبدیلی کا سبب بن رہی ہے۔

مرکزی بینک کا موقف ہے ڈالر کی قدر امریکی فیڈرل ریزرو کی جانب سے افراط زر پر قابو پانے کے لیے شرح سود میں جارحانہ اضافے کا بھی نتیجہ ہے۔