ارشد ندیم کے لیے ایک اور اعزاز، یو اے ای میں عالمی سپورٹس ایوارڈ اپنے نام کر لیا

پاکستان کے جیولن سٹار اور اولمپک گولڈ میڈلسٹ ارشد ندیم نے پیر کو متحدہ عرب امارات میں ہونے والے کھیلوں کی عالمی سربراہی کانفرنس میں گلوبل بریک تھرو ایتھلیٹ ایوارڈ جیت لیا۔

دو روزہ سربراہی کانفرنس 29 اور 30 دسمبر کو دبئی میں منعقد ہو رہی ہے۔ ایمریٹس نیوز ایجنسی (وام) نے کہا ہے کہ عالمی ایونٹ میں 1,500 سے زیادہ کھیلوں کے رہنما، پالیسی ساز اور کھلاڑی شریک ہیں جو کھیلوں کی صنعت کے مستقبل سے متعلق تبادلۂ خیال میں حصہ لیں گے۔ اس کا عنوان "کھیل کے ذریعے دنیا کو متحد کرنا" ہے۔

نیوز چینلز نے ارشد ندیم کی دبئی میں ایوارڈ وصول کرنے کی فوٹیج نشر کی۔ پاکستان کے وزیرِ اطلاعات عطاء اللہ تارڑ نے ندیم کو قوم کا "فخر" قرار دیتے ہوئے خوشی کا اظہار کیا۔

تارڑ نے ایکس پر لکھا، "پاکستان کے لیے ایک اعزاز۔ ارشد ندیم ہمارا فخر ہیں۔"

ندیم نے اگست 2024 میں جیولین میں 92.97 میٹر کی ریکارڈ توڑ تھرو کے ساتھ مردوں کا جیولن کا مقابلہ اور پاکستان کا اولین انفرادی طلائی تمغہ جیتا تھا جس پر ملک کے طول و عرض میں جشن منایا گیا تھا۔

ندیم نے دیگر بین الاقوامی مقابلوں مثلاً کامن ویلتھ گیمز اور ایشین گیمز میں بھی تمغے جیتے ہیں۔ نومبر میں ندیم نے سعودی عرب میں اسلامی یکجہتی گیمز 2025 میں مردوں کے جیولن تھرو میں طلائی تمغہ جیتا۔ سات کھلاڑیوں کے مقابلے میں چھے کوششوں میں انہوں نے 83.05 میٹر کا تھرو ریکارڈ کیا۔