دریدہ دہن مصری خاتون اینکر ٹی وی شو میں اخلاق باختہ گفتگو پر ملازمت سے فارغ

مصر کے ایک نجی ٹی وی چینل نے شرم وحیاء سے عاری گفتگو کرنے پر سرکرہ خاتون صحافی اور پروگرام کی میزبان کو ملازمت سے ہٹا دیا ہے۔

العربیہ ڈاٹ نیٹ کے مطابق مصری ٹی وی چینل ’المحور‘ کے پروگرام ’انتباہ‘ کی اینکر منٰی عراقی نے حال ہی میں اپنے ایک ٹی وی شو میں شرم وحیا کے بارے میں اخلاق سے گری اور نفرت انگیز گفتگو کی تھی جس پر عوامی حلقوں میں اس کے خلاف شدید غم وغصہ کی لہر دوڑ گئی تھی۔

ٹی وی چینل کی طرف سے جاری کردہ ایک بیان میں اینکر کے نا مناسب الفاظ سے ناظرین اور عوام کو پہنچنے والے صدمے پر معذرت کی اور ساتھ ہی کہا کہ منیٰ عراقی ٹی وی چینل کی پالیسی اور معاشرتی ومذہبی اصول وروایات کی خلاف ورزی کی مرتکب ہوئی ہیں۔ اس لیے انہیں کام سے روک کر ان کے خلاف تحقیقات شروع کردی گئی ہیں۔

بیان میں کہا گیا ہے کہ ’المحور‘ چینل مصر میں خانگی اور عائلی امور پر بحث کرتا ہے۔ چینل کا پندرہ سالہ طرہ امتیاز ہے کہ اس نے کوئی متنازع بحث نہیں چھیڑی اور نہ ہی قومی ثقافتی اور مذہبی اصولوں کو پامال کیا ہے۔ چینل منیٰ عراقی کے الفاظ کو نا مناسب قرار دیتے ہوئے اس کے خلاف قانونی کارروائی کا مجاز ہے۔

خیال رہے کہ منیٰ عراقی نے اپنے ٹی وی شو میں خواتین کی عصمت ریزی سے متعلق گفتگو کے دوران جنسی تعلقات کے بارے میں غیر مناسب انداز اپنایا اور مردوں کی کھلے عام توہین کی۔